بغيت نعاود لكم القصة ديالي واخا عارفكم ماغتيقونيش ..
الموهيم واحد النهار لقيت اختي صغيرة كتفرج لواحد لفيديو غريب فواحد سيت وحاولت نعرف شنو كانت تدير بالضبط ...
كان ليل ومشيت لعندها لبيتها باش نقوليها نوضي تنعسي راه تعطل لوقت ، منينن قربت من بيتها سمعت واحد صوت فشي شكل ، صوت ماشي ديالها ،فتحت الباب بشوية وبقيت تنشوف بنص عين باش متحصلنيش ولقيتها تتفرج على فيديو اونلاين فواحد سيت ....الإطار ديال لفيديو كان فيه للألوان والقلوبة والورد ، والوسط لفيديو خدام كان فيه واحد راجل لابس كسوة ديال ارنب بيضاااا فحال لي كتشوفو فالصورة لتحت .. معرفتش علاش مي شكل ديالو تيخلع ومرتاحيتش ليه ، حسيت بشي حاجة واقعا ماشي تالهيه وخا الإيطار والألوان ديال لفيديو كيبينو انه سيت ديال دراري صغار مي مرتاحيتش ليه..ختي عندها 7 سنين كيفاش طاحت على هاد لايف ..
داك الأرنب فلفيديو كان تيشوف فلاكام وسمعتو كيقول لختي "وخا نطلب منك واحد طلب صغير ديريه" لكان ممكن هزي راسك ،منين سمعت هاد الهدرة عاد زدت دخلت راسي باش نضرب طلة وشفت ختي تتهز راسها وتتقول انها موافقة ، بقيت هادي باش نشوف اش غيقول ليها .. وهو يسولها الأرنب " واش عندك باباك وماماك ...ياك ؟ "
هزات راسها وقالت "ااااه"
"وعندك أخ "
هزات راسها وقالت " اااه "
واخت ؟
هزات راسها وقالت اااه
وهو يقوليها " نقولك واحد سر "
شفت ختي غير تتقول ااه وكتهز راسها وبقيت متبع ..
قاليها " عائلتك كاملة تيلعبو معايا ولكن مباغيينكش تجي تلعبي معايا واش عندهم الحق ؟ "
هزات راسها وقالت " لا "
وهو يقوليها " أنا غنجي لداركم وغنختار غير واحد لي غيلعب معايا.. ويلا بغيتي نختارك خاصك ديري على قبلي واحد لحاجة "
هزات راسها وقالت موافقة
الأرنب بقا تيضحك وقاليها "نقدر نجي هاد ليلة باش نلعبو ؟ "
هزات راسها ووافقات
الأرنب بقا ساكت شوية وهو يقوليها "فخبارك راه خوك واقف حدا الباب وكيسمع لينا من صباح "
غير سمعت هاد الهضرة خواو ليا الماء فركابي ودفعت لباب وجريت لعندها بزربة وحيدت ليها لبيسي من يديها قبل متمحي سيت ولا دير شي حاجة فلول كان تيصحاب ليا شي سكايب ولا شي ابب بحالها ونا نتصدم ولقيت انه فيديو عادي وخدام غير فالأبب لي تتخدم فيديوات سولتها قلت ليها فين لقيتي هاد سيت لي جبتي منو هاد لفيديو بقات ساكتا ومبغاتش تدوي .فتحت ليسطوريك وتصدمت منين لقيتو كامل خاوي وممسوح !
حيدت ليها لبيسي وقلت ليها صافي نعسي باراكة من سهير راه فات لحال ، وقلت حتال صباح ونعاود لماما وبابا كلشي ونشوفو شي حل لهادشي ..
مشيت لبيتي وحاولت باش ننعس مي مقديتش وبقات فبالي ديك راه خوك من صباح حدا الباب تيسمع لينا ، ايلا مكانش هادا لايف كيفاش عرف انني كنت حدا الباب وكيفاش عرفني انا اصلا ..
.. بقيت تنفكر ونحاول نفهم حتا نعست بلا منحس !
فقت صباح مسخسخ وعيان واستغربت من 2 حوايج ، الأولى هو انه علاش مزال مفيقني تاحد مع العلم ان ماما كل نهار كتجي تصدعني فالبيت ، والحاجة الثانية هو مال دار هادية ومكنسمع لحس ديال تاشي حد ..وهي تشدني الرعدة..
مشيت لبيت ماما وباابا ونا نتصدم لقيت ماما مقتولة ومضروبة ب بكثر من 20 دقة بجنوي ، وبابا ملاوح فالأرض باين كان تيدافع عليها مي شي حد ضربو وقتلو والبيت عااامر دم انا مصدقتش قلت مع راسي تنحلم مشيت لبيت ختي تنلقاها ميتة مخنوقة شي حد خنقها بمخدة ووجها زرقا وعينيها حمرين ..وختي صغيرة مكايناش كاااع فدار اختافات ..
جاو لبوليس ملقاو لقاو دليل واحد هو كسوة ديال أرنب عامرا دم هي نيت لي كان لابسها الراجل فلفيديو ومن فوقها ورقة مكتوب عليها " عنداك يصحاب ليك نسيناك ، راه غير باقي مجاش وقتك وصاف"
لبوليس لحد الآن ملقاو حتا دليل على شكون قتل واليديا ولا شكون خطف ختي وفين مشات ..وبقيت عايش كل نهار كل ساعة كل دقيقة ونا تنتفكر داك لميساج وشنو وقع لعائلتي تنترعد وتنقول مع راسي واقلة غير تنحلم دبا نفيق ونلقا كولشي عايش ..
وإلى يومنا هاذا تنعيش الرعب وكنتسنا نوبتي توصل كيفما طرا لعائلتي
Aucun commentaire:
Enregistrer un commentaire