سبابي ولد عمي
الجزء الأول<br>
قصتنا غاتبدا من محل للإلكترونيات وإصلاح الهواتف النقالة .. عند اسماعيل المعروف بأخلاقو العالية وبراعتو فالخدمة كاع الناس كايبغيوه وهو كايبادلهم نفس الشعور ... إلا بنت عمو لي مكايحمل فيها الشعرة وهي بدورها كاتبادلو نفس المشاعر والأحاسيس الجياشة .. وهو مزال كايخدم خدمتو بكل حب وتفان وهي توقف عليه هاد الأخيرة كي الزلط&nbsp; <br>
&nbsp;- (بصدمة وعدم تصديق ) بشرى ؟؟؟ صبحنا على الله وماصبحنا عليك أبنت عمي&nbsp; حرام عليك مالقيتي غير هاد نهار تجيني فيه <br>
- تجيك فالدركومة ... مالك خضر ماتعرف تا تهضر ..راه جايا غير نطمن عليك .. كن تعرف لحالة لي شفتك فيها لبارح فالمنام عيني من موراها مداقتش نعاس <br>
- (بنفاد صبر) خير وسلام <br>
- شفتك أسيدي لبارح فواحد الحالة تشفي العديان .. حفيان وجوعان ولي شافك يبزق على وجهك ويمشي زربان .. شوية جاو شي رجال أشمنك يارجال طول فالعرض فالإرتفاع&nbsp; .. ماشي ديال الدنيا هادوك %&nbsp; 100 ديال الأخرة جاو يجبدوك عندهم.. إيوا وشدو شي حجر أشمنك ياحجر طولهم طول صخر وسخونيتهم سخونية جمر وبداو يشيرو على زنافرك&nbsp; .. هادي تنفع هادي ضر .. هادي تجيك فدركومة هادي نجيك فالكمكومة ودمك كايسيل وانت كاتكشكش وكات&nbsp;&nbsp; <br>
- بشرى ؟ سمحي ليا قاطعتك ولكن بغيت نفهم واش هدا حلمك فالمنام ولا فالواقع ؟؟؟؟<br>
- كيفاش فالواقع ؟؟ .. زعمة كانتمنى يصرا ليك هادشي .. الله يعطيك العمى إلى هادشي بصح<br>
&nbsp;- أ؟؟؟؟<br>
- يعطيني يعطيني .. واخليني نكمل ليك .. إيوا هما كايرشقوك بالحجر وانت كاتعيط ليا بشرى بشرى ااااااااا ... إيوا وهي ترميني الفيقة&nbsp; نضت واقفة كانسبح هانتا كاتشوف جاياك بصندالة الميكة على شوية مانجيك حفيانة باش تشوف معزتك ...مهم مشيت عند مرات عمي (مك) قلتليها ولد عمي أش عندو ماتخبيش عليا&nbsp; .. ورميت عليها العار وهي تقول ليا راك درتي لويفي فالمحل ياك أسليحفان درتي لويفي وبنت عمك مسيكينة 2018 دخلات وهي مزال مجرجرة فسيبيرات<br>
- دابا هاد دراما كلها على الويفي ؟؟<br>
- يعطيك الويل كيفاش دراما ؟؟ أودي الحمدلله لي ماعندي نفس أما كن تقلقت .. (جبدات ليه من صاك لي كانت هازة&nbsp; واحد&nbsp; لpc&nbsp; ) شوف شوف هاد الهمزة مكاينش خوه فالمغرب يالاه مولاه دخل من برا .. ومكانش يبيعو كن ما باه لي شنق عليه ورما عليك السخط الى ما تزوجش بنتو عمو .. إيوا مسكين وباعو ليا .. عطيتو 500 درهم عربون وقلت ليه من بعد ونكمل ليك تا نجربو <br>
- لواه تا تخرجي مسارنو .. أري نشوف هدا مكاينش خوه فالمغرب!!!!!!!؟؟؟؟؟<br>
- اه حلف ليا باليمين .. وقالي الى لقيتي خوه جي نرجع ليك فلوسك<br>
-&nbsp; مانلومش عندنا الكلاخ فالعائلة سلالة .. (مشا دخل لداخل وجاب معاه pc اخور) هاهو خوه<br>
- والله إلى خوه من باه ومو!!!!!! .. كان غايصيدني الكافر .. منين جاك؟؟<br>
- كان جابو ليا مولاه شي 6 شهور هادي نصلحو ليه ساعة معاودش رجعليه <br>
- إيوا عاود فيه البيع راه الخياطة وكادير مهلة ديال 3 شهور مارجعتيش لحاجة تهرف ليك عليها <br>
- الأمانة هي الأمانة وإلى مارجعش ليه ليوم يجي ليه غدا <br>
- تانتا تلاقاه مات وشبع موت كاين شي مغربي يسمح فالبيسي ديالو 6 شهور .. مهم خليه عندي نمشي نواجه بيه داك الكداب ونرجعو ليك <br>
- كاتحلمي أبنت عمي ب 3D <br>
- (بعينين المشيشة) عاااافاك&nbsp; <br>
- مستحيــــــــــــــــــــــل&nbsp; <br>
- مانفعش أسلوب الإقناع ..كنظن بلى مانطولو بأسلوب تهديد .. ندوزو نيشان لتنفيد هانا غادة عند خطيبتك لمياء نعاود ليها على ليلى وليالي الجميلة لي جمعاتكم .. أرا ليا مشقوفي .. وها انت ها انا الى ماتحققاتش حلمتي قبل غروب الشمس <br>
- اجي لهنا فين غادة ..&nbsp; شوفي غادي نعطيه ليك وتمشي عندو دابا وترجعيه ليا داااابا <br>
- يالاه أرا .. ولايني راك واحد الكاموني ماتسواش .. دابا مابقاتش أمانة .. كاتبعو الدين غير فلي يصلاح ليكمالجزء التاني <br>
من جهة بشرى<br>
خديت لبيسيات بجوج .. ومشيت كنتمختر عند رضوان لي باع ليا البيسي .. ليوم الطنازلاخور غايدوز أسوء نهار فحياتو .. قالك و بالحلوف بلي لبيسي ديالي مانلقاش بحالو فالمغرب .. وانا غير عند القرد ديال ولد عمي لقيت خوه شقيقو .. غابلاتي إلى مادرت ليه شقيقة هاد ليلة يعاودو عليا دبيحة ..مابقاش فيا الحال حيت كدب عليا كلنا كانخضروهم مرة مرة بقا فيا التمن لي مزال كانخلص فيه طريطات دم وجهي مشا فيهم&nbsp; .. 23 عام ومزالا لي جا عندنا لدار نمد ليه يدي ضّور معايا شي نهار يضور ليا وجهي شي حد بشي تصرفيقة .. مهم وصلت لدارو لقيتو مسافر دومااااج عندو الزهر كيهرس الحجر .. هنا تحطيت بين خيارين نرجع لبيسي لداك الحقير ديال ولد عمي ولا نكمل لدارنا... هنا مافكرتش تا لقيت راسي قدام بابنا كاندق وبا خارج كايجري <br>
- با مالك يا لباس ؟؟؟<br>
- داك المزنفر ديال ولد عمك هجمو عليه شي عصابة عطاوه قتلة ديال لعصا وخربو ليه محل <br>
- أويلي يالاه كنت عندو .. (هزيت كفوفي لسما) حمدتك ياربي وشكرتك كنت على بونت يجمعوني معاه .. وقوليه مايكون عندك باس .. وها حلمت بشرى خرجات <br>
ناري على صكع واخا مساهلش وبخبيزتو ولكن كايبقى فيا نحس تابعو من صغرو ... ايوا دخلت لدار تغديت وضربتها بنعسة مافقت تال قالت المغرب الله و أكبر ..أصلا ختكم بطالية لا شغل لا مشغلة ..مهم مشينا أنا ومي عند عمي طلينا على داك العجب والله إلى حالتو ولات تشفي العدو ... نيفو تشخشخ مسكين قلت ليه إلى عاودو بناوه ليك قلهم يديروه ليك بحال هيفاء وهبي مارضاش بقا غير أأأأأأأأأأ أأأأأأ أأأأأ على نغمة خرجوها عليااا ... بالنسبة ليه أنا هي سباب حيت صبح على وجهي الله يعطيه لمسخلجزء الثالت <br>
مهم رجعنا لدار وحيت ليوم مكاينش سامحيني مالقيت مايدار وانا نجبد البيسي ديالي نونش فيه ... وغير تحل بحالا ضرباتني قرطاسة ملي شفت داك الوجه لجميل لي فشاشة ... بلاتي نلفظ أنفاسي الأخيرة .. أووووف شهيق زفير شهيق زفير ... واو .. رجعات ليا روح .. بلاتي هدا ماشي ل pc ديالي هنا تعصبت .. درجة تشابه بين هاد لبيسيات خلاتني أنا مولاتو مانفرقش إينا واحد فيهم ديالي .. وهنا تفكرت قمة شمتة لي طحت فيها .. يالاه جيت بغيت ندير ليه Arrêter حيت ماشي من طبعي نتطفل على حياة الناس .. ولكن بلاتي غير نزيد نخضر عويناتي نبرد عليا الفقصة ... كان pc ديال راجل .. غزااال تبارك الله .. ومنظم كل حاجة فبلاصتها ماشي بحال ل pc&nbsp; ديالي سوق لاربع مستف عليه&nbsp;&nbsp; مهم دخلت نتفرج فتصيورات .. زيادة على السيد جميل وأنيق ومرتب ومرضي لواليدين بان ليا بلي ينتمي الطبقة المخملية خانز فلوس غير من تصاور لي داير خارج الوطن ..الحاصول غير من بلاصتي حسيت براسي فوجت الله يفوجها عليه&nbsp; .. واخا عندو شي تصاور فلبيران مع صحابو سيد كايقصر و مقصر من جهة الله..&nbsp; أودي أنا مالي&nbsp; تقول غايعقد معايا لاكط كلا وقبرو .. يالاه جيت نطفي لبيسي غلبني نعاس .. وهو يبان ليا واحد الفيديو فلبيرو قلت نختم بيه تبقشيش ... وياريتني مابركت عليه ولا شعلت هاد لبيسي ولا مشيت عند ولد عمي صباح ... ناري ياربي أش داني ولاش مشيت .. كان هادشي حقيقي ماشي مقتطف من شي&nbsp; فيلم ولا من شي مسلسل ... حيت باين مصور بلكاميرة ديال لحيط .. غير هو مكانش HD الوجوه مضببين ..كان فلفيديو راجل هو وشي رجال ديالو واقف على جوج امرأة وراجل&nbsp; وكايهددوهم يسنيو ليهم على شي وراق&nbsp; .. ومن بعد مانفدو طلبو هز واحد العصا وبدا بوحشية كايعطي بيها لراجل على راسو تافقد الوعي كانظن فقد فيها حياتو ماشي غير الوعي&nbsp; ... والمرأة لي معاه ناضت بدات كضحك بصوت مجهد بحالا قتلو قدامها دبانة كانت مبرزطاها .. مدات يديها لداك المجرم وتسالمو بحالا كايعقدو شي صفقة وكاتقوليه <br>
- (بتمثيل ساخر) مسكين مات مخدوع فيا ... شفتي كن ماكملناش لمسرحية تا لخر .. كن دار لينا فيها رجل بكبريائي ومايبغيش يوقع ولو على جتتو&nbsp; .. ولكن من خوفو عليا وقع فالغلط ماشي غير على الوراق ههاهاااهاا<br>
سالا المقطع وأنا يديا لا ماشي غير يديا كلي كانترعد ..&nbsp; ولي زاد من توتري هو أنني بديت كنستوعب علاش مول لpc مارجعش ..يكونو صفاوها ليه&nbsp; وماشي بعيد يكونو لعصابة لي دكدكات ولد عمي صباح كانو كايقلبو عليه ... ناري أنا صافي خصني نمشي&nbsp; لهوليود حيت عقلي بدا يصنع قصص خيالية ولا نمشي نزور حيت إلى كان هادشي بصح غادي نحماقالجزء الرابع <br>
ليل كلو مابغاش يديني نعاس .. وحتى إلى تسدو عيني كايجيوني غير الكوابيس وأخر المطاف كنلقى راسي فايقة مخلوعة .. ماعرفتش شنو ندير؟؟ <br>
* ماعرفتش واش ندي لبيسي للبوليس ونوريهم لفيديو وهما يتأكدو من صحة الموضوع ”احتمال مرفوض” حيت هما كتار وإلى تشد واحد يجي تاني ينتاقم مني <br>
* نرجع لبيسي لولد عمي ولا عين شافت لا قلب وجع تاهو ”احتمال مرفوض” حيت داك المرض من بعد الهراوة لي كلا غايشك&nbsp; فهاد لبيسي والى شاف داكشي لي شفت غايمشي كايطير عند لبوليس .. ويرجعو يصفيوها لجدو فمرة .. وأراك داك ساعة لتأنيب الضمير <br>
*&nbsp; الإحتمال الثالث نشد هاد لفيديو نشرو فالفايسبوك .. باش يقلبو على المصدر ديالو ويجيو يعجنو طاسلتي ”احتمال مرفوض”&nbsp; .<br>
&nbsp;* الإحتمال الرابع نسكت وندير بحالا ماشفت ماريت .. ولكن بما أن لعصابة وصلات لولد عمي إذن مابقى ليهم والو يوصلو ليا ”احتمال مرفوض”&nbsp; <br>
* الإحتمال الخامس ”احتمال مرفوض وحتى التفكير فيه مرفوض ” <br>
&nbsp;وهداك الإحتمال الخامس للأسف هو لي درت حيت مالقيت تاشي احتمال بعدو .. خديت adress&nbsp; من واحد كارط فيزيت&nbsp; كانت فلبيسي ديال مولاه نيت .. ومشيت كانقلب عليه كان فنفس المدينة ولكن فواحد اللحظة لقيت دايرين بيا غير لفيلات تفو كنت كانتوقع غير برطمة وانا معمرة صاكي بشامبوانات ناوية ندير راسي مولات الإشهار .. من بعد عدة الدقائق من الضياع لقيت المكان لمقصود ... ولكن عاد ضحت فالضياع الحقيقي كي ندير ندخل ونلقى مول لبيسي بلا مانسول عليه حيت غانكون مشبوهة ...ونقدر نطيح فالمجرم ويقوليا جي أكبيدتي عليك كانقلب مهم مابان ليا غير واحد الحانوت كان وسط داك لفيلات داير كي القملة وسط الفراشات .. مشيت ليه وحيت كان خاوي شديت الحديت مع مولاه وبديت كنطز عليه وكنشكي ليه همي .. طبعا كلو كذب في كذب ومع ختكم خبيرة فجران لسان&nbsp; ومن بعد ساعة من دودودودو قاليا بلي الفيلا المقصودة كايقلبو على شي فرمليا تقابليهم شي مريض .. هادي هي فرصتي وخا أنا ماشي فرمليا ولكن عندي&nbsp; attestation ديال الهلال الأحمر لي عمرو ظنيتو ينفعني شي نهار .. طبيعة الحال مغايخدمونيش بيه ولكن غايدخلني لدار ونقدر نتلاقا مع مول البيسي ونعطيه بيسي ديالو ونخرج من باب واسع ... اللـــــــــــه غير تفكير خلاني نرتاااااااحالجزء الخامس<br>
&nbsp;ودابا ندوزو لتنفيد مشيت خويت صاكي من الشامبوات وطبعت&nbsp; cv ديالي بلواااااان على سعدي وعدي وضربتها ليك بواحد تفركيسة لي رجعات من بعد تكرفيسة فطرونسبور حشمت&nbsp; نقول طوبيس هه ايوا و رشيت شي رشيشات من ريحة ديال العبار لي خديت من عند العطار ولي سالات ربع سنين هادي و مزال كانشللها بالما .. مهم وصلت للمكان المقصود وبدات المغامرة لا عفوا المقامرة بالحياة .. تبادلت أطراف الحديث مع سيكريطي لي عاوني باش ندخل بطبيعة الحال بعد الكلمة الأولى لي كان مفعولها سحري (سيفطوني عندكم) والحمدلله لي ماسولش شكون أما كن جرا عليا بالحجر ... دخلت للفيلا وانا داخلة بجبهة&nbsp; أما رجليا لهلا يوريكم كن درتو شي جفنة تحتهم كم دارو ليكم شي طرح ديال الركزة دايزو الكلام .. دخلوني لواحد البيرو من ديزاين ديالو بان ليا هو مكان الجريمة لي كان مسجل فلبيسي هنا ماعرفت واش نتقدم ولا نهرب طبعا كان غايكون اختياري تاني ولكن رجليا خانوني .. كان جالس واحد راجل فيه أربعيني العمر .. واش هو القاتل؟؟ هداو عليا لوجه فلفيديو كان مضبب .. لداكشي قنعت راسي بالعكس باش نتصرف على طبيعتي .. مهم قاليا دخلي دخلت قاليا جلسي جلست خفت غير لا يقوليا شي حاجة ونديرها أهياناري أبشرى توكضي <br>
- شنو سميتك ؟؟<br>
- بووووشرى <br>
-(كيهضر وكايقلب فشي وراق)&nbsp; مرحبا أبشرى .. صافطك عصام&nbsp; ؟<br>
- لا سيدي الكدوب على الله حرام .. ماكانعرف لا عصام لا عصْمات .. (هنا حط لوراق وشاف فيا) مول الحانوت جاركم معرفة وعارفني مسيكينة كانقلب على خديمة وقاليا راكم كاتقلبو على فرملية <br>
&nbsp;- (شاف فيا بشوفات غامضة ) . وشنو هو ديبلوم وليكسبيغيونس لي عندك ؟<br>
- (عطيتو cv .. اعترته دهشة من الألوان المشعشعة وصورتي لي خصها غير القضبان ويولي محكوم عليا بالإعدام&nbsp; )عندي شهادة ديال الهلال الأحمر و 6&nbsp; شهور سطاج فسبيطار الحومة .. من بعد ماخديت شهادتي .. قابلت شهرين مي سعدية وربع شهور مي الهاشمية لاااا خمس شهور شهر الخامس كاعما خلصوني فيه .. با عبد المغيت شهر ونص .. وسي عبد العاطي جوج سيمانات ... الله يرحمهم أجمعين ويوسع عليهم ضيقة القبور <br>
كنت متوقعة يقلب عليا الطبلة من بعد جملتي الأخيرة ولكن قلبني انا بواحد الإبتسامة الخفيفة&nbsp; لي صدرات منو .. من بعد سولني أش كانعرف ندير .. بديت كنبلبل عليه كانعرف _ندير هادي_ ونعرف _ندير هادي_ وماكانعرفش ندير هادي زعمة شوية ديال _الواقعية_ ولكن نتعلم راسي خفيــــــــف&nbsp; ((((نتعلم أنا فالمريض ابن سينا ومدارهاش الله ينعل لي مايحشم )))) مهم من ديما كنت كانصبّر راسي وكانقول بلي زهري باقي مالقاش تربة المناسبة فاش ينبت ولكن ليوم كتاشفت بلي زهري نااااابت ولكن وسط الحشيش :/ .. هادشي عرفتو وتيقنت من بعد ماتقبلت فالخدمة لي ماكنتش باغاها ومادمرتش باش نلقاها&nbsp; صراحة مافهمت تا لعبة باقا مامصدقاش هاد سيد باينة باغي فالمريض الخدمة مهم وحنا مزال كانتافقو على ساعات العمل والأجر ديال الشهر وهي دخل واحد لمرأة شارفة ولكن وقفتها حسن من وقفتي .. المشية بالعبار والهضرة ديال الخضار .. جات كاتسول على الممرضة جديدة ((( زعمة أنا)))) ولكن صعقت&nbsp; ملي شافت cv ديالي .. رد فعل منطقي وبدات كادابز معاه وقالت ليه بلي واش جريتي على فرمليا عندها اكسبيغيونس وقابل على وحدة يالاه عندها شهادة ديال الهلال الأحمر&nbsp; صراحة ماكرهتش نقولها عندك صح ولكن رد عليها بلي ماشي سوقها وهو عارف أش كايدير وأنا قاليا غدا نقدر نبدا&nbsp; نتفضل .. ومشيت وخليتهم كايتناقشو ... وأنا غادة بحالي بديت كانحنزز فدار على الله يبان ليا مول pc ساعة بانو ليا غير تصاورو وعرفت أنني فالمكان صحيحلجزء السادس<br>
ماعرفتش واش نرجع لداك الخدمة ولا نجلس فدارنا نتكمش ... صراحة أنا غير بنت بسيطة مدوزة وقتها باش ما عطا الله .. ما زوينة ما ذكية&nbsp; مافيا تا حاجة تعجب ... عمري حسيت براسي بطلة ديما أنا هي دور الثانوي الغير مهم والغير مفيد .. ملي كايجيوا ناس يعاودو قصصهم وتجاربهم البطولية أنا كانبقى غير كانشوف .. وبعد المرات كنبدا نعاود الكدوب وانا لداخل ديالي مراضياش عليا .. وليوم جات القصة تا ليديا خصني غير نكتب سميتي فيها واخا مانكونش البطلة على الأقل يكون ليا دور مهم&nbsp; نكون بيه فخورة براسي ... خصني غير نكون شجاعة ..حسنا أقنعتُني أنا قادمة إليك أيها التاريخ <br>
الله ينعل لي ما يحشم شفت راسي تحمست إلى مايشدوني يدبحوني ويلوحوني الكلاب يكددوني وداك ساعة ماشي غير يكتبوني ف التاريخ يطراسيوني فالجغرافيا<br>
&nbsp;تفووو حرت <br>
&nbsp;درت صلاة الإستخارة ... ومشيت لخدمتي جديدة كاينة موت وحدة ... استقبلوني&nbsp; استقبال حار مليء بتخنزيرات ديال كانشوفوك هاه ولا هاه direction à&nbsp; okasha .. وراوني غرفة المريض لي كان عندو الدكتور وهاد الأخير كايتسناني باش يشرح ليا المهمة&nbsp;&nbsp; ... دخلت الغرفة وبحالا صعقني الضو ماعرفتش واش من الفرحة ولا من الصدمة .. <br>
* الفرحة حيت كان مول lpc لداخل <br>
*والصدمة حيت كان هو المريض لي خصني نقابلالجزء السابع <br>
وائل هادي هي سميت مول ل pc دار حادثة سير هادي 3 شهور .. تضرب فيها&nbsp; ضربة خايبة فالراس دخلاتو كومة هاد الكومة أو الغيبوبة ماشي عميقة كنظن كايسميوها الحالة النباتية المستدامة&nbsp; (Persistent vegetative state) كاتسمى نباتية حيت المريض كايكون بحال شي نبتة حي وكايفتح عينيه ولكن مكايستاجبش .. مهمتي فهاد الحالة أنني نراقبو ونعتني بيه ونعمر واحد لاليست عطاها ليا دكتور ديالو ديال أهم تطورات والمستجدات لي كاتحصل للمريض من أجل تشخيص سليم ... داز أسبوع على أول نهار ليا فالخدمة مهمتي التمريضية كنقوم بيها على أكمل وجه ولكن المهمة لي جيت عليها لهاد دار واقعة فبلوكاج وذالك للأسباب التالية<br>
*&nbsp; أولا ماعرفتش فمن نتيق <br>
* تانيا المراقبة من جميع زوايا .. خارج غرفة المريض كاع العينين عليا .. بطبيعة الحال هدا راجع لأمه الكريمة مكاتحمل فيا الشعرة وكاتقلب ليا غير على سبة .. تقول أنا كنتها .. حيت باغا لولدها ممرضة متمرمسة .. ماشي وحدة كانت كاتسطاجي فسبيطار الحومة .. أما المراقبة من داخل الغرفة .. وهادي هي لي مطيحة ليا الما فركابي .. كاميرة شادة البيت كامل .. يعني نرمش يشوفوني يشوفو العما ان شاء الله .. تفو على حالة .. والمشكلة هي انني ماعرفتش شكون لي كايشوفني من موراها لي ربما متأكدة منو أنها ماشي مو .. وهنا كاينين فرضيتين ,.. يا إما هاد الكاميرة مديورة للسهر على صحة المريض ولا العكس كايقلبو على الفرصة المناسبة باش يصفيوها لجدو ... وهنا كايبقى حل واحد خصني نستفز هداك لي كايشوف فيا باش يوريني وجهو ..&nbsp; وأنا جالسة فبلاصتي المعتادة فكرسي حدا سرير ديال المريض غانبدا نتبع مقولة هبل تربح<br>
&nbsp;- أري يديك أسي وائل (خديتهم وبديت نتلمس فيهم ) الله شحال روطبين .. كون يشوفوك الشركة سانيكروا وجافيل يتخاطفو عليك ...سعدات هادي لي ديك&nbsp; ... بلاتي بلاتي (جبدت تيليفوني ) مصائب قوم عند قوم فوائدو .. وقالك أسي وائل الفرص كسحاب ماعرفتش أش كادير واقلة كنتنقط شتا وكاضرب بتبروري&nbsp; .. مهم يدي مع يديك وشي تصويرة تفركع مرارت العديان .. تشييييك ..بلاتي نشوفو كي جاو يديداتنا .. ويلي ويلي يدي هي لي كاتبان يدين راجل ..ظز حيد عليا يديك بناقص <br>
&nbsp;ولا عرفتي شنو أريها ... طاحت عليا واحد الفكرة جهنمية والله تا أنا غا ضايعة معاكم فهاد البلاد عندي واحد العقل دماااغ تبارك الله وصلى على النبي الله يحجبني من عينين العديان&nbsp; (خديت تيليفوني وركبت نمرة ) ألو لالة بدرية لباس ؟؟ صحيحة كلشي مزيان ؟؟ لولاد ولجواد ؟؟ قربات عيشورة ؟؟&nbsp; كاين شي تيبخيرات ؟؟ عندي ليك واحد الهميزة دايزها الكلام ياللا بدرية ليك حصريا&nbsp; وفمكيتها .. والله تا انت لولى لي كانعيطليك ماعيطت لا اللاعيشة لا اللامينة عرفاك انت لي كاتخدمي فيهم بالكاليطي الجودة والإتقان .. إيوا بلا مانطول عليك كانقابل هاد ليام واحد سيد داخل فغيبوبة ميت وحي .. هو حقا باقي حي ولكن راه بمجرد ما يحل فمو تزهق روح ... فهمتي المقصود هاد العام كسكسو على حسابي بلا ماتبقاي تجرجري لينا فروضات ...ليك انت بوحدك&nbsp; 500 درهم لكيلو ؟؟ مابزاف ماولو .. هاد سيد إلى فتل ليك كسكسو تاكليه خضر بلا لبن بلا لحم ... يديه بحالا فيهم العسل كايتقطر سبحان الله هاانتي هانا نصيفهم ليك فالواتساب وردي عليا الخبار (قطعت تيليفون) ... هانا صيفطت ليها تصيورات .. عرفتي أوائل تصدق ليا هاد لافير ونولي بوكو حبة عليا بليمين وباش كايحلفو رجالا الشلاغمية&nbsp; تا نبرع خويا ونديك لمولاي عقوب تكمد عظيماتك .. بلاتي بلاتي هاهيا كاكتكتب ...قالت ليك أسيدي يديك مايصلاحوش حيت باقا روح طلع وتهبط فيك وعلى مقالولها جوادها باقي تدك وتدردك&nbsp; .. يدردكو عليها جدارمية إن شاء الله .. إيـــــوا هدا هو السعد المبوشي ,, جمع عليا يديكالبارت الثامن <br>
جاني واحد الملل رهيب .. غرفة بأربع جدران .. وسطها أنا والمريض ..الكاميرة كاتشوف فينا .. والمريض كايشوف فالسقف دون أي حركة تذكر .. وأنا كانشوف فليام لي تلات بيا وجابتني لهنا .. شوية شتا بدات كاطيح نضت كانجري لسرجم لي كايطل على جردة <br>
- عرفتي أوائل كنحماق على ريحة ديال تراب ملي كاتبدا طيح شتا .. وكنستطى على نبقى نشوف شتا كاطيح .. ختشك رومانسية واخا مابايناش فيا ... على ذكر رومانسية ناقص هاد المنيظر غير شي&nbsp; مسمنة سخونة ومكرملة أووووه إحساس لا يقاوم .. خليني نمشي نشوف واش كاين مايتحنجر فداك الكوزينة عندكم<br>
يالاه حليت الباب وانا نشهق كانت غاتهزق ليا روح ..&nbsp; كانت مو ورا الباب واقفة كي الموت .. عرفتي والله مكانكدب عليكم إلى قلت ليكم كاتشبه لداك راوية&nbsp; لي كانت مع رشيد شو مؤخرا <br>
- فين غادة ؟؟<br>
- (لجايحة) نشرب <br>
- راهو الما لداخل <br>
- بصراحة فيا جوع وبغيت نمشي تا&nbsp; ناكل&nbsp; واش مسموح ؟؟؟<br>
- جلسي دابا نصيفط ليك مع الخدامة الماكلة&nbsp; <br>
- (ويلي هادي منين ماخرجت ليها كاتشدني ماكرهاتش تربطني فهاد البيت ) وهو بصراحة بصراحة بغيت نسرح تا رجيلاتي (قبل ماتعطيني شي عذر تاني) علاش مكاتبغينيش نتفرق على وائل تا لحظة واش خايفة عليه من شي حد فهاد دار ؟؟؟<br>
- (بقات كاتشوف فيا وكا تشوف فيه بنظرات غامضة) سيري ودغيا رجعي .. أنا غانبقى معاه <br>
عرفتها مغاتقدر تعطيني تا جواب ... لداكشي مشيت أنا شخصيا نقلب على الجواب ديال هاد اللغز&nbsp; .. دخلت للكوزينة كان فيها واحد الراجل كبير فالعمر كايكاكل مشيت وجلست حداه بدون إذن وبلا حشمة بلا حيا <br>
- الحاج واخا نشاركك الطعام ؟؟&nbsp; <br>
- مرحبا أبنتي (ما كمل مرحبا تا لقاني فلقمة تالتة)&nbsp; انت هي الفرملية لي كاتقابلي سي وائل ؟؟<br>
- هي شخصيا بلحمها ودمها <br>
- كيبقى أبنتي واش غايبرا ؟<br>
- هدا عليا ألحاج عمرو وعمرنا&nbsp; عند الله <br>
- ودابا حالتو مسكين فين وصلات ؟؟<br>
- (بديت كنتفلسف عليه ) دابا حالتو مستقرة يقدر يفيق فأي لحظة .. حيت ماعندوش شي مشكل عضوي بقدر ماعندو مشكل نفسي ... هو حاليا فصدمة باغي يفيق ولكن خايف ..&nbsp; مقادرش يواجه .. هاد صدمة ألحاج خلات روح ديالو وماتقدرش تحكم فالجسد .. بحال ملي كايجيك بوغطاط .. عمرو جاك ألحاج&nbsp;&nbsp; ؟؟<br>
- جاااني أبنيتي <br>
- إيوا نفس الإحساس عندو ... وكيكاتعرف ألحاج مايمكنش شي خيط تخشيه فالبرا&nbsp; بلا ماتحل العقدة&nbsp; .. لداكشي مايمكنش جسدو يستاجب للعلاج وروحو داخلة فصدمة.. قول ليا ألحاج يعطيك الستر .. وقعات لوائل شي حاجة قبل من الحادثة ؟&nbsp; <br>
- مات باه مقتول .. ومن بعدها بشي شهورة دار كسيدة&nbsp; <br>
- عليها مو ديما خايفة عليه .. يعني شاكة بلي الحادث غايكون مدبر <br>
- اه وبالخصوص ملي كان كاتصرف بغرابة قبل الحادث<br>
-&nbsp; إيه ولي قتل باه لقاوه ؟؟؟<br>
- لا مالقاو تا شي دليل <br>
- ممممم ومالقاو زعمة تا شي متهم ولا شي واحد مشبوه فيه زعمة ؟؟<br>
يالاه بغا يجاوبني وهي تجي عندي واحد الخدامة قالت ليا تكلمي لسيدة (ام وائل) .. وهو غير سمع سيدة ناض كايطير .. تفو عارفة أنا ماعندي زهر .. رجعت لخدمتي ولملل كيف العادة .. من بعد ماسالا وقتي خرجت كانطير وأخيرا غانخرج من هاد الدار أوووف شحال كاتخنق وشحال فيها ديال القنط تقول خالية من الحياة ... ماشي بحال دارنا لي الهرج والمرج ... وصلت لدار وفرحتي اندثرت&nbsp; واكتشفت أن لعنة ديال داك دار مزالا تابعاني .. وهادشي كلو ملي قالت ليا الوالدة بلي راس رويضة ديال ولد عمي جا ليوم وطلب البيسي ديالو حيت مولاه جا وميمتي بكل حب وإخلاص عطاتو ليه .. وجهدي ضاع على الفاضي .. ذهب الدليل وحصلت بشرىمع القتيل ... لا لا بلاتي يديوا البيسي ديالهم ماشي مشكل ....ولكن لااااااا مايمكنش هادشي لي كانفكر فيه مشيت كنجري نتأكد من لبيسي وداكشي لي خفت منو طحت فيه ... البيسي ديالي لي داو صااافي هادي هيا لخرة ليك أبشرى ملي يعرفو البيسي ديالمنالجزء التاسع <br>
مشيت كنجري لدار عمي ومي كاتعاير فيا كاتقوليا غابشوية عليك مالهم داو ليك ولدك .. لهلا يوريك ألوليدة راه غايديو&nbsp; ليا روحي ملي يعرفو لبيسي ديالمن ... اسماعيل مالقيتوش فدارهم قالوليا بلي راه فالمحل يتحلو ليه العظام&nbsp; ومايلقاو مايكبصو فيه الصكع ديما خارج ليا فعودي<br>
- بشرى أش جيتي ديري عندي .. ياك قلت ليك ماتبقايش تجي عندي نهار لي كنشوف فيه كاينزلو عليا المصايب كي شتا <br>
- تنزل عليك لي ماتعتقك ان شاء الله .. لبيسي فين هو ؟؟<br>
- داه مولاه <br>
- مولاه ؟؟؟ واش كاطنز عليا .. مولاه راه حالتو حالة تشفي العدو <br>
- باش عرفتيها ؟؟<br>
- شفتها فالكارطة.. غاقوليا واش حمار ولا بغل باش نعرف إينا نوع ديال الحيوانات كنتعامل معاه .. واش مابانتش ليك حالتي أوجه الزلط<br>
- دحشة تفو .. واش هاداك البيسي ديالك ؟؟<br>
-&nbsp; لا لا على هادي خصها تزغريتة كبرتي وبديتي تفهم&nbsp; .. ومالك مافكرتيش فيها ملي عاطي لبيسي ديالي ياوجه ببوش ؟؟باقا ماكملت تا خلاصو ؟؟وباغي ترزيني فيه<br>
- إيوا صافي دايرة ليا حالة على شقفة تقول&nbsp; فيه أسرار دولة ... جيبي لبيسي ديال سيد و غدا نعيط ليه يردو ؟&nbsp; <br>
- والله وماشديت البيسي ديالي فيدي لا شديتيه .. باغي ديري ليا عامرة فخاوية ونصدق لا زيزي لا حب الملوك .. هدا لي داه وصفو ليا كيداير ؟؟<br>
- بشرى رجوع الله .. تسطيتي نوصف ليك أنا راجل ؟؟<br>
- (مم عندو صح ولكن خصني نخرج راسي ونجر ليه لسانو) ياربي رزقني الصبر ..&nbsp; انا نفهمك بشوية .. دابا ان شاء الله ياربي الى جاو تاني هادوك لي فرشخوك داك نهار وهرسوك ليك وجهك هاد المرة .. باش غانعرف انا سيد لي دا البيسي ديالي <br>
-&nbsp; لسانك يقطعو كلب بعيد البلا عليا...&nbsp; ياربي السلامة ماحنا على فالك <br>
- اسماعيل راه أقدارنا مكتوبة فالسما والمكتوب مامنو هروب ... وصف ليا سيد باش ندرك زلافتي راه والله تاعيانا ؟؟<br>
- سيد غاتعرفيه بالبيسي ديالك شغلك فكمارتو كي دايرة <br>
- واش عندو شوية ديال شيب فراس ؟؟ وعندو موسطاش ؟؟ بحالا جاي من القرن تمنطاش ؟؟<br>
- اه .. باش عرفتيه <br>
مشيت وخليتو كايبلبل بوحدو ,.. عرفتو هو سيد لي قبلني نهار لول فالخدمة&nbsp; كان خو وائل الكبير غير من باه .. ولي&nbsp; ماقديتش نتيق فيه أبدا .. كايبان بحال شي صندوق عامر بالأسرار.. غامض لواحد الدرجة لا توصف ... واش&nbsp; يقدر يكون هو القاتل لي فالفيديو؟؟ وعليها قبلني فالخدمة حيت عارفني ماعنديش خبرة ومعايا حالة وائل&nbsp; غاتزيد للأسوء واهاكا ماعمرو يقدر يفيق باش يقول الحقيقة ؟؟ وعليها امت وائل خايفة على ولدها بزااف وما كاتخليه تا دقيقة بوحدو&nbsp; ؟؟ كنظن الأمور بدات توضاحالجزء العاشر <br>
ليل كلو مادانيش النعاس .. العيا لي كان فيا رجع خوف وحيرة وأفكار ديني وكوابيس تجيبني .. ماعرفتش واش نهرب ولا نواجه .. وحتى إلى هربت واش غانرجع نعيش حياتي بحال شحال هادي وبحالا تا حاجة ماطرات ... ونيت درت بحالا تاحاجة ماطرات ومشيت لخدمتي حيت نوعا ما مطمأئنة&nbsp; حيت لبيسي ديالي مافيهش تصاوري نظرا لأنني يالاه شريتو ولكن إلى&nbsp; مشاو تا تعمقو فالبحت وفلاوه غايلقاو cv ديالي مكسل تما .. اما الى مشاو تاحلو الفايسبوك الله يرحمك أ بشرى ويوسع عليك&nbsp;&nbsp; ... قبل مانبدا خدمتي وندوز نهاري فرعب قررت نواجه مصيري هو لول ... ومشيت عند خو وائل ولقيتو كيف العادة جالس فالبيرو ديالو ولكن لي خارق العادة هو البيسي ديالي قدامو كايقلب فيه .. هنا نسيت كي نبلع ريقي من الخلعة .. قاليا تفضلي ومشيت جلست قدامو وأنا عينيا على البيسي ديالي لهضرة تلفات ليا<br>
- مادموزيل بشرى .. أش حب الخاطر ؟؟<br>
- بغيت نهضر معاك فواحد الموضوع <br>
- لي هو ؟؟<br>
- ممم موضوع كايتعلق بوائل&nbsp; <br>
- كنسمع تفضلي ؟<br>
- ( كنظن ماعارف والو على مول البيسي ) كنظن بلي سي وائل خصو يبدل لجو كعلاج نفسي .. حيت نفس الغرفة ونفس الجدران لمدة 3 شهور من الصعب انه يقدم شي استجابة وهو على نفس الحالة <br>
- (بدا كايشوف فيا شي شوفات مافهمتهمش هادشي لي خلا قلبي يضرب ف90 ) وشنو كاتقتراحي ؟؟<br>
- ساعة ولا ساعتين فجردة ديال الدار&nbsp; يشم الهواء النقي .. ويسرح عويناتو<br>
- (بدا كايفكرقبل مايجاوب) واخا أنا غانتصرف&nbsp; .. يمكن ليك تفضلي (هو كيهضر وانا عيني غير على البيسي) مادموزيل ؟؟ شي حاجة واخرى ؟؟<br>
- بيسي جديد بصحة ( ويلي ويلي اش قلت ) خليت ليك راحة<br>
خرجت كنطير لا يبدا يسب فيا ويقوليا دخول الصحة هداالجزء الحادي عشر&nbsp; <br>
من بعد ساعات قليلة .. صافط ليا لي يعاوني باش نخرجو وائل للجردة فكرسي متحرك .. كان الأمر صعيب ولكن يستحق العناء ومنها نشغل راسي .. و نتفك من داك الكاميرة اللعينة .. وخا العنين علينا ولكن حسن تعرف شكون لي كايشوف فيك من محظي من مجهول<br>
-(سرحت رجيلاتي ورديت وجهي لشمس)&nbsp; الله على شميشة .. من بعد شتيوية لي كانت البارح ,... دايرة كي دوا كاتدفي .. هاد العام ربيع غايجي على بكري ان شاء الله .. إلى ماقاومتيش وبريتي مغاديش تشوفو هاد العام&nbsp; ... لداكشي الى ماتحكمتيش فجسدك هما غايتحكمو فيه&nbsp; ..&nbsp; لالا بلاتي انا ما خصنيش نبقى ممرضة خصني نولي شاعرة تبارك الله وصلى على النبي سرورات عليا شي مرات كايطيحو عليا شي هضور تقول غير ابراهيم الفقي كايهضر .. أناا ضايعة فهاد المغرب ما فيها لا إن ولا حتى&nbsp; .. وائل انا عارفاك كاتسمعني و كاتفهمني&nbsp; واش مغادير حتى شي محاولة باش ترد عليا ,, واش غاتبقى هاكا حياتك كاملة .. واش خايف من شي حاجة ؟؟ جاوبني عافاك ؟؟؟ <br>
بدون اي ردة فعل .. الأمر لي خلاني نستسلم ونفشل .. ولكن ملي شفت مو جايا وقفت وقفة العسكر فالحرب العالمية التانية .. عارفة ليوم غاتبهدلني تبهديلة داايزها الكلام .. ولكن صدماتني من تصرفاتها لي كانت عكس توقعاتي .. فرحات و تقبلات الوضع بصدر رحب أن ولدها يغير الجو مدحاتني على هاد الفكرة&nbsp; .. ماعرفت علاش نسيت بلي&nbsp; هي أم والأم ديما كاتبغي لولدها الأفضل .. ديما ملي كاتشوفو كاتبدا تبكي بحرقة ولكن ليوم حاولات تمالك نفسها .. بصح صعيبة يموت راجلك مقتول .. ومن بعدها ولدك يدير كسيدة ويفقد فيها الحركة .. بقيت سارحة فهاد المنظر ديالهم وهي كاتعاود ليه على صحابو وجديدهم وكادير فيه النفس باش ينوض تاهو ويكون عندو جديد .. وكاتبدا تقتارح عليه&nbsp; سميات البنات لي بغات تزوج ليه وحدة منهم ههه .. وأنا مزالا ساهية وهي تجي واحد الخدامة عيطات ليا نتكلم لسي خالد (خو وائل .. خخخخ على سلامتي عرفت سميتو)&nbsp; .. نضت وخليت من ورايا وائل مع مو .. وانا قلبي كايزدح كايزدح ناريييييييي ويكون عرف البيسي ديالمن ..&nbsp; ولكن الأسوء من هادشي هو لي طرا ليا .. ملي دخلت للبيرو ولقيتو هو اسماعيل ولد عمي جالسين .. هاد الأخير لي صدمتي كانت بحجم صدمتو أو أكترالجزء الثاني عشر <br>
كانظن لا متأكدة بلي لعبة هنا غاتسالي وأنا تفضحت بدون أي شك .. <br>
- خالد : بشرى واش انت لي خديتي لبيسي من لبيرو؟؟ <br>
-أنا : (بخوف وصدمة )&nbsp; لا وعلاش غاناخدو <br>
-&nbsp; خالد : من شوفاتك لي كنتي كاديري فيه فصباح .. خلاتني نشك فيك انت لولى ( قربي ليا وشدني من يدي بعنف) اعتارفي شكون لي مصيفطك&nbsp; ؟<br>
- أنا : (بألم)&nbsp; أي قصحتيني طلق مني .. أنا ماخديت والو <br>
- اسماعيل : طلق منها ... بشرى أش كاديري هنا ؟؟؟<br>
- أنا : مكاندير والو .. هنا خدامة .. كنقلب على الرزق ديال الحلال .. واش هادشي حرام انت لي أش كادير هنا ؟؟؟<br>
-&nbsp; خالد :&nbsp; (باستغراب ) واش كاتعرفو بعضياتكم ؟؟؟<br>
- اسماعيل : بنت عمي .. بشرى نهار قالو ليا خدمتي ماتيقتش .. حيت انت آخر وحدة فهاد دنيا تبغي تخدم انت من النوع لي كايبغيها تجيه باردة .. ففسري ليا أش كاديري هنا ؟؟<br>
- أنا : مليت فدار وراك عارفني غارقة كريديات لداكشي قلت مافيها باس نخدم <br>
- اسماعيل : ومالقيتي غير هاد&nbsp; دار تخدمي فيها&nbsp; ؟؟؟<br>
- أنا : هادشي لي جاب ليا رزقي <br>
- اهاه وكنتي عارفة بلي هاد دار هي ديال مول البيسي لي كايشبه لبيسي ديالك ؟؟&nbsp;&nbsp; <br>
- أنا : ....<br>
- أنا : جاوبي مالكي سكتي ؟؟&nbsp; ولا أنا نقوليك ..بالفضول لي فيك شعلتي لبيسي ديال سيد وحيت شفتيه بوكوص ولباس عليه قلتي نلوي عليه <br>
- أنا : (ودموعي فعيني) تلوي عليك لفعى ان شاء الله .. بعد مني <br>
-&nbsp; خالد :&nbsp; واخا تشرحو ليا أش واقع&nbsp; ؟؟؟<br>
&nbsp;بدا كايشرح ليه من زاوية لي كايشوف بيها الموضوع .. أما أنا عينيا تسدو بالدموع لهاد درجة كانبان حقيرة فعينيه وبدون مستوى .. حسيت براسي تحكرت وتظلمت وماعرفتش أش غاندير ؟؟ واش نسكت ونخلي تهم عليا ولا ندافع على راسي ؟؟ <br>
-&nbsp; خالد :&nbsp; بشرى واش شفتي لفيديو ؟؟ <br>
- أنا : اه <br>
- اسماعيل : اينا فيديو ؟؟<br>
-&nbsp; خالد :&nbsp; وعلاش ماقلتيهاش ليا ؟؟ <br>
- أنا : كنت خايفة تكون انت مع دوك العصابة&nbsp; ... ماكنت قادرة نتيق فتا واحد كنت بغيت غير نوصل لبيسي لمولاه .. ولكن فاش شفتو فداك الحالة&nbsp; تلفت وماعرفت ماندير .. كنت كانتسناه يبرى ولا لقا شي حد أخور نتيق فيه كتر <br>
-&nbsp; خالد :&nbsp; وعلاش ماتقتيش فيا انا نيت ؟؟<br>
- أنا :ماعرفتش .. واقلة حيت لبيرو ديالك هو مكان الجريمة .. ولا حيت واخا ماعنديش خبرة قبلتي نكون ممرضة ديال خوك هادشي لي خلاني نشك بلي باغي فيه الخدمة <br>
-&nbsp; خالد : هه (باستهزاء) واش كاين شي حد كايقتل باه ؟؟ وكن ماكنتش خايف على خويا كاعما ندير كاميرة فبيتو .. وااش عقلتي على شنو هو أول سؤال سولتك ملي شفتك ؟؟ واش صافك عصام ياك ؟؟<br>
- أنا : اه بصح<br>
-&nbsp; خالد : كن قلتي ليا اه كاع مانقبلك.. حيت هو المجرم كان ناقصنا عليه غير الدليل .. وقبلتك انت حيت بنتي ليا بسيطة وظنيت أنه مايغرك لا مال ولا جاه .. والى ماخدمتيش مزيان غاتخافي على خدمتك .. وباش نسد طريق على داك عصام باش مايجيبش لينا شي متطفلة جديدة بحجة عندها خبرة <br>
- أنا : واش بصح ؟؟ أنا مافكرتش هاكدا <br>
- اسماعيل : (بنفاد صبر) شي حد يفهمني ؟؟؟<br>
- أنا : اللقوة العسرية سكتنا المرة جايا ملي تبغي تفهم فهم قبل ماتحكم&nbsp; ... ودابا البيسي فين هو ؟؟ <br>
- خالد : إيناا واحد فيهم .. على أي بجوج بيهم تسرقو؟<br>
- أنا : أشنو ؟؟؟ لبيسي ديال وائل راه مزال عندي فدار <br>
- اسماعيل :&nbsp; خديتو وأنا جايبو خطفوه من بين يدي&nbsp; .. مافهمتش علاش هادشي كلو على بيسي ؟<br>
- خالد : (ضرب بجهد فلبيرو )ورجعنا لنقطة صفر <br>
-أنا :&nbsp; تتت واش بنت ليكم أنا يلاه حاطني لكار ؟؟ واخا نستعمل لبيسي ديالك ؟؟ (مع خالد) <br>
- خالد :&nbsp; اه<br>
مشيت حليت فايسبوكي وخديت واحد ليان ديال google drive&nbsp; وبمجرد مابركت عليه وهو يطلع لفيديو ديال الجريمة اسماعيل تصدم ملي شافو أما&nbsp; خالد فرح<br>
-خالد :&nbsp; واو تبارك الله عليكالجزء الثالث عشر<br>
بان دليل وتشد المجرم وأخيرا هه&nbsp; ولكن المرأة لي كانت معاه فلفيديو مزال حيت كانت ضايرة بظهر وحتى فاش دارت بجنب كان وجهها مضبب وصوت مقطع مهم لازم الحقيقة ماتبان واحد النهار .. الله على راحة ماتخيلتش المهمة غاتكون بهاد البساطة .. كان عليا نتيق فخالد من نهار لول&nbsp;&nbsp; كن راني نقصت عليا بزاف ديال الخوف والخلعة والكوابيس المزعجة .. دازت شهر على داك نهار .. مزالا فخدمتي ولكن مابقاش داك الملل لي كان فلول أولا حيت عرفت شكون لي داير الكاميرة وتانيا حيت ولينا كانخرجو بزاف أنا ووائل من الغرفة .. لي ماعرفتش علاش واخا تشد المجرم مزال ماتجاوزش الصدمة .. بصح بدا يبان عليه تحسن ولكن ... مهم وحنا أنا وياه جالسين فجردة كيف العادة<br>
- بعد تفكير طويــــل وعميـــــق وجدي ...&nbsp; عرفت أوائل يديك فاش غاينفعوني (خديت يديه) دابا كي شفتي هاد رطوبية والبيوضة ماعطاهاش ليك الله غير&nbsp; هكاك .. كلا ياعزيزي.. غايكونو هما مصدر رزقي .. كيف ؟ قررت ندخل مع أوريفلام فداكشي ديال البيع والشرا وإن شاء الله غانبقى نجرب البروديات فيديك وندير ليهم شي حساب فالأنستغرام ونبقى نشرهم فكروبات العيالات فالفايسبوك .. وهانا ها انت إلى مابقاوش يصبو علينا الفلوس كي شتا .. وهاد المرة كلو بما يرضي الله <br>
- فاش كاتهضرو ؟؟<br>
قاطعاتني مو .. طيراتها مني جاب الله ماسمعاتنيش من لول أما كن هجراتو ليا&nbsp; <br>
- (بتمسكين )&nbsp; والو ألالة .. كنت غير كانقول ليه بلي وصل عمر زواج وخصو ينوض يتزوج ...ويشوف ولادو كايلعبو قدامو .. شحال غايبقى زوفري راه العمر كايطير <br>
- ههه عندك صح إمتى نشوفك أوائل بوليداتك .. غايكون أسعد نهار فحياتي والله العظيم <br>
- ان شاء الله ياربي دابا يجي داك نهار ... الحاجة وائل مكانش كايبغي شي بنيوتات قبل مايدير الحادثة هه حيت راجل معروف عليه قلبو كي رمان كايبغي عشرة فدقة هه ؟؟<br>
- لا وائل ماشي من داك نوع ..&nbsp; كان داير لينا فيها رجل بكبريائي هاهاهاهاها<br>
نفس الضحكة ونفس الجملة .. خلات الضحكة لي كانت ففمي تموت&nbsp;&nbsp; ... مايمكنش هادشي لي كانسمع مستحيـــــــل .. عيني جات فعينين وائل وهنا فهمت كلشي واخا عقلي مابقاش يستوعبالجزء الرابع عشر : <br>
ام وائل هي المرا لي كانت فالفيديو ولي مشاركة فالجريمة&nbsp; .. ماقديتش نتيق .. يقدر يكون غير شي خطأ .. ولا أنا لي فهمت كلشي غلط .. مستحيل ... كملت نهاري فالخدمة وأنا غير ساهية وسارحة ...مصدومة وتالفة ... ماعرفت أش ندير واش نتيق فقلبي لي كايقول ليا هادشي مايمكنش ولاعقلي لي كايآمن غير بالأدلة وكايلغي الخرفات ديال الأحاسيس .. ياربي أنا غادي نحماق ,... وأنا راجعة لدار بحال شي آلة كاتحرك غير تلقاائيا .. مرديتش لبال لطريق وكانت غاضربني واحد طنوبيل تا بديت كانسمع ناس كايعايروني «شوفي قدامك ألعورة» .. إلى كانت هادي حالتي أنا لي يالله عرفت ام وائل شهر هادي علم الله كي غاتكون حالة ولدها ملي عرف مو قتلات باه .. كانظن الحادثة لي طرات ليه حاجة طبيعية .. وهاد الصدمة لي ماقادرش يتخطاها كاتفسر كلشي<br>
جا نهار جديد ولكن ماهو الا تتمة معاناة الأمس .. صباح كلو درت خدمتي وأنا ساكتة ماقديت نقول والو وحتى إلى هضرت مانعرف ما نقول .. كنشوف فوائل وقلبي فيه واحد الحرقة بعد المرات كاتبدا طل من عيني على شكل دموع ومرات اخرى كاتبقى فصدري كاتخنقني .. ماعرفت مالي وليت حساسة بحال المرا الحاملة&nbsp; .. وصلات العشية وخرجنا أنا وائل لجردة كيما العادة .. كان الجو بارد واوقلة غاطيح الشتا .. هاد الجو لي عكس لي مشاعري لي كان عندي لداخل ووليت غاير كنبلبل&nbsp; <br>
- عرفتي أوائل عمرني عاودت لشي حد قصتي وبقا ساكت وجالس كايتصنط ليا .. كلشي كايخليني فنص هضرتي وكايعطيني بالظهر&nbsp; أصلا تاحد مكايعرف قيمتي&nbsp; ... لداكشي انت أكتر واحد عارفني بلي كنآمن بمقولة الفرص كسحاب .. وبما أنك جالس جالس وماعندك مايدار نقرقبو ناب بيها ..&nbsp; أنا ياسيدي كيما كاتعرفني و&nbsp; كايعرفوني كاع الناس&nbsp; .. بنت بسيطة&nbsp; ظريفة ومصوابة وحادكة ومرزنة و متبتة و متخلقة ومتدينة وتحطني على جرح يبرى ,, ويكون فراسك مكايعجبنيش نشكر راسي&nbsp;&nbsp; .. مهم مستوايا دراسي الباااااااك موان دو (هادي زربت عليها)&nbsp; عاااازبة هادشي مكايعنيش أنهم ماجاوش عندي الخطاب بالعكس جاااااو ولكن ... خلينا منهم .. فين وصلنا أه فالخدمة .. الخدمة أعدى حاجة عندي فالدنيا علاااش ؟ حيت بالنسبة ليا هي واحد العذاب يتجدد شهريا وفلول ديال شهر كايبردو عليك بجوج دريال زعمة كايشارجيوك .. هاد جوج دريال كاتخسرها على داك الخدمة نيت فطورنسبور الماكلة حويجات باش تبان نقي إلى ماجاوره .. وهكا كاتبقى فدوامة مفرغة تا كايرجع شعرك بيض وكايجيك الوهن العضلي .. لذالك مبدئي فالحياة هو الإستمتاع .. أنا ماشي ضد الخدمة كلا ياعزيزي ولكن إلى كانت الخدمة مافيها لا استمتاع لا والو و غير على ود الفلوس&nbsp; بناقص منها&nbsp; ... وبيني وبينك أنا باقي مالقيتش هاد الخدمة لي غانستمتع فيها ... وانت ماشي استتناء الخدمة معاك ملل فملل فملل وكن كنت كانخدم على ود الفلوس كن خرجت نهار لول ... ولكن عرفتي شنو لي مخليني نجلس هنا شهر كامل&nbsp; .. ماشي زينك ماشي فلوسك وماشي حيت بقيتي فيا ..&nbsp; أول نهار جيت لهاد الدار جيت بصح على ودك بغيت نعطيك البيسي ونخرج من باب واسع .. ولكن ملي شفتك فهاد الحالة قلت نتسنى شوية على مانلقى شي حد نتيق فيه&nbsp;&nbsp; ونخلي ليه البيسي ونمشي بحالي .. حيت بصراحة أنا خوافة وحياتي هي أغلى حاجة عندي ... أنانية وماعزيزش عليا نضحي .. ولكن معاك حياتي كلها تخربقات وليت كاندير داكشي لي مكانبغيش وكنخلي داكشي لي كانبغي ... ماعرفتش&nbsp; شنو هو تفسير ديال هادشي .. زعمة تكون مك دايرة ليك القبول هه .. عطيني يديك ..&nbsp; هاد المرة ماشي باش نتصور بيها&nbsp; ولا نفتل بيها كسكسو ولا نجرب بيها منتوجات اوريفلام .. هاد المرة بغيت نقولك أنا معاك وغانبقى معاك تانتزوج عنداك يسحابك تانموت إيوا صاف والله ماوقفتي على رجلك لا وقف معاك شي حد .. مهم فين كنا .. دابا نهضرو أو نهضر فالمفيد ..&nbsp;&nbsp; وائل عارفاك باش كاتحس ... ولكن ماحاساش باش كتحس .. لداكشي انت أدرى براسك .. ولكن واش كايسحابك بلي بوضعك هاكدا كاتحمي بيه مك راك غالط .. انت دابا كاتعدبها ..&nbsp; بصح غلطات ودارت يديها فيد شيطان .. ولكن أهون ليها تنوض تعاتبها وتعايرها وتغضب عليها ودخلها للحبس حسن ليها من هاد سكات لي انت فيه .. وائل إلى محاولتيش تحكم فجسدك وتشبت بالحياة ليوم ... غدا ملي غاتبغي غاتلقى الوقت فات ..&nbsp; و غاتبقى&nbsp; محبوس فهاد الكرسي فداك الغرفة وفهاد الجسد تغوت مكاينش لي يسمعك ... تمنى الموت وماتلقاهاش&nbsp; واش كاين كتر من هاد العداب ليك ولمك&nbsp; .. لقرار كايرجع ليك <br>
يديه لي كنت مزيرة عليهم رخفت عليهم وفالأخير طلقتهمالجزء الخامس عشر <br>
سالا وقتي وقبل مانمشي دزت عند أم وائل لبيتها .. دقيت وفدقة تانية فتحات .. ملي عرفاتني جايا نهضر معاها على وائل خلاتني ندخل .. ومع دخلة ماتجي عيني غير على البيسي ديالي .. ملي شافتني شفتو حاولات تغطي <br>
- بلا ماتغطي عارفاك انت لي خديتيه من لبيرو ديال خالد وعارفا بلي انت لي كاينة فداك الفيديو <br>
-أ أ أش كاتقولي ؟&nbsp; <br>
-&nbsp; لي جيت نقول ماشي هو هادشي .. جيت نقول بلي ولدك .. علاجو من بعد الله هو انت .. انت داه وانت دواه <br>
- كيفاش ؟؟<br>
- ماعرفتش واش عارفة .. ولكن ولدك عارف بلي انت لي قتلتي باه<br>
- اشنو ؟؟؟ مايمكنش؟؟؟؟ <br>
- يمكن .. ويمكن هادشي لي خلاه يتصدم ويفقد السيطرة على السيارة&nbsp; .. ويمكن هادشي لي خلاه يفقد الأمل فالحياة ويبقى فهاد الحالة إلى الأبد <br>
- مايمكنش يكون عارف <br>
- الى كنت أنا برانية وعرفت .. فكيفاش ولدك لي ملي حل عينيه حلهم عليك<br>
- أنا درت هادشي غير على ود مصلاحتو ؟؟<br>
- شكون قالك هو باغي مصلاحتو قد ماباغيك انت حداه&nbsp; <br>
- انت معارفاش باه كي كان داير .. كان سكايري وحشايشي .. كاع فلوسو وفلوس مرتو لي ماتت وفلوس خالد لي ورتهم من عند عائلة مو وفلوسي حتى أنا كان باغي يقمر بيهم ويخلينا فالزنقة .. كانت هاديك هي طريقة الوحيدة أنني نمتل عليه ونلعب على الوتر الحساس ديالو باش نحيد ليه سيطرة على كاع فلوسنا&nbsp; <br>
- مكانش عليك تقتليه .. وتدمري حياتك <br>
- إلى ماقتلتوش كان غايقتلني&nbsp; ملي يسيق الخبار بداكشي لي درت <br>
- ماشي عذر <br>
- اه ... كان كايبان ليا بلي الموت هي الخلاص الوحيد ديالو وديالنا ... 30 عام ديال العذاب معاه كان كايبان ليا هداك هو الحل .. ولكن دابا عرفت بلي كنت غالطة<br>
- هو كان غالط وانت زدتي غلطتي .. وولادكم شنو ذنبهم ؟؟ انا غانمشي دابا .. كانتمنى هاد المرة تلقاي الحل الصحيح لي مايناسبكش غير انت يناسب حتى ولادكالجزء السادس عشر<br>
دازت يومين على داك نهار كان عندي فيهم ويكاند لداكشي معارفاش شنو طرا كانتمنى داكشي لي ماتحققش ف3 شهور يتحقق فيهم .. وحتى إلى ماتحققش أنا مغاديش نستسلم أش كايقول المتل قطرة الماء تحفر في الصخر ليس بالعنف ولكن بالتكرار<br>
.. ولداكشي داخلة وكلي عزم وإصرار وحماس .. داخلة ولي لقيتو كانقوليه صباح الخير والورد والياسمين .. كلشي كايقول مال هادي ولكن ماكانقدرش نكتم حماسي أش ندير؟&nbsp; <br>
- صباح الخير صفاء (الخدامة)<br>
- صفاء : (بحززززززن) صباح النور .. بشرى وائل مات<br>
هنا ماحسيت براسي تا جيت على الأرض دنيا دارت بيا .. كانسمع غير صوت خالد جاي من البعيد<br>
- خالد : شكون لي مات ؟؟؟<br>
- أنا : (بصدمة) وائل <br>
-خالد :&nbsp; أشنو ؟ عاد كنت عندو <br>
-صفاء :&nbsp; لا سيدي هو لي قاليا ملي تجي بشرى قولي ليها راه مت <br>
- خالد :&nbsp; هههههه وعاد بطلنا إلى الحياة ... نوضي أبشرى الله يكون فعوانك <br>
مصدومة ماعرفت مانقول هو ماماتش باقي حي&nbsp; وفاق من الغيبوبة وولا كايهضر من الفوق واو .. بديت نضحك وسط دموعي .. و نبكي وسط ضحكي .. تخربقت ماعرفت باش تبليت .. نضت جمعت لوقفة حيت إلى بقيت هاكا غانجمع عليا جوقة .. مشيت لغرفة واش نكدب عليكم إلى قلت ليكم ترددت قبل مانحل ؟؟ والله تا كانجي نحل الباب ونرجع لور .. خايفة .. فرحانة .. كاع الأحاسيس تجمعو فيا ووليت بحال شي عروسة داخلة تشوف العريس كي داير .. صافي براكة أبشرى.. ويلي داخلة روض .. قريت شي أدعية وسور من القرآن الكريم وماكرهتش كن كنت على وضو كن صليت جوج ركعات قدام باب .. دخلت .. كان جالس قدام سرجم <br>
- (بصوت حنين ورقيق ومرزن لقد تفاجئت من صوتي ) سلام <br>
دار عندي وأنا مشيت جلست قدامو ناري بحالا أول مرة نشوفو .. بطبيعة الحال هاد الحشمة كلها نابعة من أفعالي الماضية ... ميــــمتي إلى كان كيستوعب داكشي لي كنت كانقول ليلتي ليلة <br>
- احم قالوليا وليتي كاتهضر .. على سلامتك .. بطبيعة الحال غاتكون مستغرب من شكون أنا <br>
- بشرى <br>
-(ناري صوتو شحال حلو)&nbsp; احم بطبيعة الحال قالوليك عليا .. شحال أنا هبيلة&nbsp; .. طبعا مانساوش يقولو ليك بلي&nbsp; أنا هي الممرضة ديالك لي كنت كانعتاني بيك وكنسهر على راحتك طيلة الشهر الماضي&nbsp; ياك ؟<br>
-&nbsp; (شاف فيا واحد شوفة ديال واش متأكدة ... ناري با هدا بدا يلعب ليا تا بشوفات ) هاهي بدات تاني <br>
-&nbsp; (قلت نبدل الموضوع حيت ماشي من مصلاحتي نبقاو فنفس سيجي ) الجو زوين .. شمش سخونة&nbsp; .. أ أ ربيع بدا ينبت .. وفرشات تزقزق <br>
- (هنا ماحبسش راسو من ضحك )ههههههه&nbsp; الفراشات أشنو ؟؟؟<br>
- ( مارضيتش ) أأأأ قصدت العصافير&nbsp; <br>
- ههههههههه <br>
- صافي&nbsp; أزبل خطأ تيقني .. غاتبدا ضحك ليا هنا نهار كامل .. أجي شفت لي يالاه&nbsp; كايفيقو من الغيبوبة كايبقاو عام مكايهضروش .. نتا تسرح ليك الحلق على يومين سبحاااااانك ياجليل <br>
- دابا نتي لي تسرح ليك الحلق <br>
&nbsp;- أخويا باز سكاتك حسن من هضرتك&nbsp; <br>
- واش بصح ؟؟ كنتي ظلي ترغبي فيا نهضر <br>
- ندمت تا ندمات ليا زغبة لخرة فشعري .. أستغفر الله على هدا الفعل <br>
- واش بغيتيني نسكت <br>
- لا لا غير هضر خود راحتك .. سرح لينا قرجوطتك<br>
- ههههههههههههه<br>
- (عندو واحد الضحكة كادوخ ) هاهو بدا يضحك تاني .. قلنا ليك هضر ماشي ضحك .. كايهروك حوايجك؟؟؟<br>
- ماشي بخاطري هههه <br>
ناري نجلس مع هدا ساعتين نطيح فيه طول وعرض <br>
-(وقفت مخلوعة من هاد الفكرة ) احم&nbsp; نمشي نشرب <br>
- راهو لما غير حداك <br>
- نمشي نشم شوية ديال الهوا <br>
- حلي سرجم <br>
- بحالك بحال مك سلامة ..&nbsp; كن كنت نعجة كن ربطتوني .. (جلست) هاهي جالسة .. أجي بعدا فين هي مامولفاش ليها تحيد عينيها عليك <br>
- (هنا اختفت البسمة من وجهو وبان الحزن فعينيه ) مشات سلمات راسها <br>
- أشنو ؟؟؟<br>
- مابغاتش فين ما نشوفوها نتفكرو أش دارت .. لداكشي قررات تمشي تاخد جزائها على خطأها <br>
- مسكينة غضب لحظة غاتدفع تمنو غالي .. شافتك وانت كاتهضر ؟؟<br>
- اه وهضرنا ليل كامل&nbsp; ..&nbsp; كنت غضبان منها وواخا هكاك هي الأم ديالي وماكنتش قادر نفرط فيها ,, حياتي كاملة وأنا كانشوفها كاتعدب وماقدرتش نزيد نشوفها كتألم ف الحبس&nbsp; .. لداكشي خصني نبرا دغيا باش نمشي نشوفها واش غاتعاونيني ؟؟؟&nbsp; <br>
- أخخخ عليك ياالعفريت مامتيقاش يومين تسرحات ليك فيها القرجوطة&nbsp;&nbsp; <br>
- هههههه وهو صراحة قبل بشويـــــة من يومين <br>
- ياك يا الحقير .. وكنتي مخليني كانهضر بوحدي كي طبل .. ليوم ندخلك كومة ديال بصح ههههالجزء الأخير <br>
دازت عام ... وائل برا ف 6 شهور&nbsp; كلها كنت معاه فيها .. و 6 شهور مشا يخدم فمدينة بعيدة باش ينسى ويبدا حياة جديدة ... هاد 6 شهور الأخيرة كنت كانهضر معاه غير فمواقع تواصل الإجتماعي كأصدقاء .. ليوم جاي لمدينتي وعرض عليا أنه يشوفني واخا مكانش الوقت المناسب حيت كنت مشغولة ولكن مانقدرش نفلت هاد الفرصة .. أصلا غير كانشوفو واخا غير فتصاور قلبي كايفرح .. مايكونش عقلكم موسخ ..&nbsp; راه كان المريض ديالي وغير كنشوفو كنحس بالإنجاز لي قمت بيه .. وأخيرا تلاقينا فواحد القهوة كلاس خخخ حسيت براسي من ناس الألبة&nbsp; <br>
- اأنا : السلام عليكم ورحمة الله تعالى وبراكته <br>
- وعليكم السلام ورحمة الله تعالى وبراكته أختي في الله <br>
- ههه باقي لسانك ماضي الله يستر ههه<br>
- مالي قلت شي عيب .. جلسي .. شنو تشربي؟؟ <br>
- كابوتشينو <br>
- هه واخا <br>
على ما هو كايطلب لسرباي .. عيطات ليا مي فتيليفون بديت كانقول غير هانا جايا هانا جايا <br>
- واش فخبار مك راكي معايا ؟؟<br>
- بطبيعة الحال .. بلا ماتشوف فيا داك شوفات&nbsp; ... قلت ليها راني معاك والله غير هو قلت ليها باقا كانتسالو شي فلوس ؟<br>
- ههه&nbsp; وعلاش كدبتي ؟؟<br>
- بغيتيني نقوليها غادة نخضر بيه عويناتي .. باش تنحرني .. هادشي راه حرام فالإسلام .. أخر مرة نشوفك بسر.. بغيتيني جي لدارنا <br>
-ههه يااك وفاش كنتي كاتشدي ليا فيدي ليل ونهار داك ساعة مكانش حرام <br>
- تشدك الموت وماطلق منك وغير روحك فيديها&nbsp;&nbsp; <br>
فهاد اللحظة جاب لينا سرباي طلباتنا <br>
- هاكي ألالة الكابوتشينو ديالك&nbsp; وهاك أسيدي<br>
- (قاطعتو) بلاتي الكابوتشينو هو القهوة ؟؟؟؟ (بداو كايشوفو فيا بتعجب ) شد شد أخويا&nbsp; رجع إلى القهوة نشربها فدارنا .. جيب جيب ليا باناشي ... أجي بلاتي ياكما البناشي هو أتاي ؟؟؟؟ ( هاد المرة تزلعو بالضحك) مالكم كاتفرنسو .. راه عمري جيت لشي قهوة والله العظيم بنت دارنا متخلقة ومرزنة وم<br>
-( قاطعني وائل ) سير أخويا جيب ليها الباناشي راه ماتساليش ليك ليوم ههههههههه<br>
- احم بصح عمري مشيت لشي قهوة شرف عظيم ليك انت أول واحد<br>
- حلفي بالله <br>
- مانحلفش على وحدة كنا كانتساو الكار وسلفونا واحد القهوة الكراسة ولكن با ومي لي جلسو على الكراسة أنا جلست على واحد الصاك كان فيه البيض البلدي .. لهلا يوريك مي أش دارت لي عليهم .. اما ريحة قلبات لكار ... أما لحوايج لي تهرسو وسط منهم سيمانة وهنا مرقضين فجافيل وسانيكروا ديال الخزامة هه<br>
- هههههههههههه شفتي انت غاتقتليني يا إما بدعاوي يا إما بالضحكإيوا قول أش بغيتي تقول راني مزروبة <br>
- على أش عندك .. ياك ديما مسالية قبك <br>
- يا على كيداير ... ليوم عرس داك المقزدر ديال ولد عمي <br>
- آآآآ غاتغسليلهم المواعن<br>
- يغسلوك بلا ما ... ياك قلت ليك ماتبقاش تنرفزني لا ندعي عليك شي دعوة ونحصل فيك ... إيوا سيدي راني غادة العرس معروووضة بحالي بحال ناس .. كريت تكشيطة وصبااااط وشااال لا شال جاني غالي 10 دراهم والله مانحطها فيه .. إيوا أسيدي من أجل البحت عن عريس ...بيني وبينك سعدااات هدا لي غايديني غاندلعو وغا نتهلا فيه ونوكلو ونشربو من فلوسو طبعا&nbsp; ونوقف معاه فالشدة ونكون ليه سند&nbsp; وعون مدى الحياة&nbsp;&nbsp;&nbsp; <br>
- كانحس بحالا كاديري الإشهار لراسك لا ؟ ههه هي خصني نحضر فعرس ولد عمك<br>
- علاش تا انت كاتقلب على عروسة ؟؟ <br>
- لا كانقلب عليك<br>
- وراك كاتقلب عليا ديال بصح .. عنداك يسخن عليك راسك وتفكر تزوج بيا ؟؟<br>
- ومالو ؟؟؟<br>
- أنا مانتزوجش واحد كان كايقصر فالبيران <br>
- ياك أسليحفانة ... والله ماكنت مقصر <br>
-&nbsp; اه هما كانو مقصرين وانت كنتي كاتسبح <br>
- باش بغيتيني نحلف ليك .. والله إلى غير كان عيد ميلاد صاحبي وحضرت ليه .. ماقصرت ماطولت<br>
- بصح شفت الكيكة ... صافي واخا قبلت إمتى تجي لدارنا <br>
- وشكون قالك أنا قابل ؟؟؟ <br>
- على أنا مالي أش درت <br>
- سميت شوافات كاع عارفاهم وخدامة معاهم من لفوق&nbsp; .. عنداك يسحابك نسيت ملي كنتي ناوية تفتلي بيدي كسكسو <br>
-خخخخ وازبل راه كنت كاندير ليك هكاك غير باش نعصبك وتنوض .. والله أسيدي مكانعرف لا سحارة لا قمارة <br>
- صافي صفات الخواطر ... إمتى نجي لداركم؟؟؟ <br>
- ليوم <br>
- وياك قلتي عندكم العرس <br>
- العريس حدايا شغاندير بالعرس ديال داك المبوق واخا صراحة هو لي لقانا ... يالاه نمشيو نحضرو ليه بجوج ؟؟ <br>
- لا غانمشي نشوف الواليدة هاد نهار وخصني نشوف خالد باش نجيوا نخطبوك كما تستحقين <br>
- ممكن نمشي معاك عند امك ؟؟ عاد نمشي لعرس من بعد<br>
- ياك عاد شفتيها سيمانة لي فاتت <br>
- ودابا نزورها بصيفتها عكوزتي ههه <br>
- ههه واخا يالاه ( نضنا ) <br>
- شحال عندك بعدا فالكونجي ؟؟ <br>
- 15 يوم <br>
- آآآه مايصلاحش يوجد العقد من هنا لتما ,,, مهم غير يوجد العقد ديني معاك .. مانديرو لا حنة لا عرس <br>
- علاش ؟؟؟<br>
- قلت ليك مكايهمنيش لفلوس وشكليات .. لي كايهمني هو الإستمتاع <br>
- (داار شي شوفات) بديت نفهمك غلط ههههههه<br>
- والله إما قصدت داكشي والله العظيم واحق الله<br>
- صافي غير زيدي تيقتك .. شوفي سرباية وصحابو كايضحكو باينة عاودليهم ههههه<br>
- هههههه وماكنش فراسي الكابوتشينو هو القهوة هههههههه <br>
تمت بحمدالله كانتمنى تكون عجباتكم القصة وشكرا على المتابعة <br>
وبرعوني تعاليق ودعوات عند ظهر الغيب إلى عجباتكم القصة ... إلى ماعجباتكمش ماشتكوم ماشفتوني